Libre adaptation de la Ferme des Animaux de Georges Orwell
Pousawar: Dan la Fèrm KazKapar, dan zané swasannbrèz, pandan lo révolision kréolist, in bann zanimoun la mèt la pat ansanb, pou fout déor Lom, pou rèv in sosiété ras-mélé, plis zis, ou sa tout zanimoun sré égal innalot. Landmin lo révolision, lo zanimoun mwatié boug mwatié koson, Pétrel Wa Ho la pran lo komannman dan la Fèrm. Soman vwala, in zistwar kréol lé pa in zistwar si na pwin in mé, kom diré mon mémé Mari Edmé, kan li la pèrs son furonkle ankisté sanb zidéo trotskist bann troudki troudo té vé fé anval ali, ek zot ti vwa naziyar. Vitman la fureur du tonton Wa Ho la levé, akoz lavé d’zanimoun perspikas kom Sèrf Sinagalé té kap pèrs lo vwal lilizion bann frankoson té mèt dan la fèrm, pou dilué lo kosonsité zanimoun té koz an proz, in pé kom in la-dous-i-san dan prézidis esklavazis.
Dan lil la dilision, koz-an-proz : alala lo solision pou misionèr frankoson i dilu zot léritaz ti krim, pou pran swin disting lo ti koson, sanb lo gran koson : dinkoté i fo dilué, i fo sirtou pa gard la koulèr ! lot koté i fo distingé : ti koson ek gran koson na rien a war ! Alala in legzanp sistèm doubpensé Georges Orwell noré pi razouté dan son liv 1984 : koméla sistèm doubpensé Soligrokèr Sien Sien ek Zigo Waho i tienbo sektèr kan i fo sort lé kro pou protèz léritié Proz Vèrzès : sétadir lo komandèr Wa Ho, sat i défann korzéam bann zagrésèr lo grèn i sèm in pé tro fasilman si zanimèl si la plaz.
Dan lil la dilision, i fo rès an sirfas, rod pa la tras la ras, akoz tout i sort dan mèm bato, soman vwala, zordi pa tout i rès dan mèm étaz. Si lidéolozi kréolist i di koma : na pwinn triaz dan nout zansèt, poukwé zordi néna dan zot lasièt ?
Dan la Fèrm Kazkapar, pandan k’bann mouton i fé tout pou gyin in ti plas bordaz dan bann loz frankoson misionist, na inndé zanimoun i antrèn l’IA (lintélizans ansestral), pou rokonèt lo kolonialité dilué dan la kréolité.
La Fèrm dé Zanimoun,
in zanr d’dokimantèr animalié,
a nou manié ek nout rasin mayé,
mé lo kèr sinsèr pou war pli klèr,
pou fé d’triaz dan nout foré.
Nou sa va ? Alé 1, 2, PAN ! Dans !
Ecriture, mise en scène, interprétation: Benjamin CLEMENT
Lieu: Rivière du Maât