Nou antèr 2020?

Oté sa té in lané wi ! Mé eske té vréman in lané la godoing kom tout domoun i di ? Eske nou la pa pas akoté in lokazion sanz vréman pou vréman nout fason fé ? Riskap lé pokor tro tar non ? Nou pé ankor pran lo tan rêver ? Pran lo tan…zis pran lo tan ?

Dan tout se kaloubadia 2020 nad zaffèr navé d’gou wi !  Nou la rankont domoun inkroyab la o Tévlav ! Domoun la o lé fran, la konpri bonèr ke la rishès lé sirtou dann kèr.

Anou, nou kontinié avansé, dan tout kalité somin, lo zour kom la nuit. Dayèr nou la vi pa bezoin la limièr pou nou bien viv dan klarté la line !

Nou avans, nou gard derrière, nou di waouuuuw nou la finn fé in bon bout somin !

I fé 5 ans lo ti bébét Balades-Créatives i ramp partout dan nout gayar péi, sak foi li tash maniyèr tir dann zi la tèr la rézine la Rényon, ek tout son gayarsité, pou kado son piblik adoré in spektak an flèr, ek lo kèr ! Ce ti bébét la ramp dan santié, ou sa li la rankont zoli moun, zoli fason war la vi, zoli Natir, zoli zistwar, ek lo ban zartis la donn ali la min. Tousala la agrandi son kèr, la donn ali la zèl !

Astèr li la finn bien manzé, li la gyin san komprann in pik de croissance !

Zordi li ramp pi, li kour, li vol si somin la vi ! Li néna dé bel pattes pou li kontinyé santi lo vibration lo kèr la Rényon, ek dé bel zèl pou rèv ankor plis, bat karé si la line !

Donk non 2020 té pa in lané la godoing, nou la kan minm gyin fé 63 spektak, nou romersi lo 1300 moun la ni war anou. Mé boudikont, anfinnkont, fo mi antyin kont, fo mi arvien promié débi : nou la finn fé 324 spektak, pou 8636 moun ! Heu skiz mon pardon, non mwin la pa vantar, mi di zis sa pou tout lo soidizan professionèl touristik té i di amwin : « Non mais en créole ça ne marchera jamais ! » Ou encore l’agence communication la rofizé karéman fé mon nouvo site internet en dizan : « Pour moi lire le créole c’est indigeste » (et sé ban kréol i di sa !) Ou enkor lot zèf direktèr la DAC OI : « j’espère que vos balades là elles ne sont pas en créole 974 ! ». Kom zot i pé war, mèt anlèr lo kréol lé touzour in ti guine konpliké… Mé lé pa grav, sa i ranfors anou, nou préfér rogard tout lo zoli la Rényon !

Tousala pou di azot : nou koné pa koman 2021 i sa tourné, donk pa bezoin fé in prévisionnel, dan touléka i sa tourn in ot maniyèr… Alon plito dansé, santé, fé lo gazé si i fo fé lo gazé, et sirtout viv nout rèv !

In gran mersi sat i suiv anou dann somin, san zot nou sré pa la ! In gran mersi osi lo ban zartis touzour plis kréatif !

Ti somin, gran somin,

Bat karé min dan la min,

Pou zoli nout domin (kom diré mon dalon Sully).

In gayar lané 2021 pou zot !

VWAR NOUT L'AJINDA