Lèrk ou pèrd lèr dan kouran dolo, minm brans pouri wi tienbo
Lèrk ou lès kouran dolo bèrs out kadav, la minm ou gyin dans si limon ek son bav.
Rafale la frésèr dan out kèr, lo san an leripsion
Mouvman la vi i kour dan lam la mèr
Akros aou tanpirkipé
Bèl piébwa innsékat va kasé
Bel kap piton sra afésé forstan tanbour dolo si son fès
Mouvman la vi i kour dan lam la mèr
La sours i suiv son destin amèr
Va riv in lèr, ton karkass sra an pousièr
Frésèr dan kouran i révey la mor
In sor la mor pou rapèl aou viv out vi, pa an sirvi
Pou sir rès ouvèr pou la zwa i sézi aou kom zézèr tansalé
Poézi Cézèr tan sakré
Po sézi mon lémé, tan sikré.
Po seize the day. Aprési la vi kwa !
La riv an lèr i trakas pa pou son kèr
La riv yèr té i mass tout ti galé grokèr
La riv in lèr kouran dolo la arondi zot doulèr
Ki sa na toupé awar lo pié lézé pou alé dansé si limon ?
Ninza sat maron ! Sak ti pa i kont. I fé mont lo shakti.
Akout lo fanmté mélodi dolo i blouz sak ti note si limon
Oblizé fé in kont, panga koudkoign, bel blé si lo kor boulouzé
Mouvman la vi i kour dan lam la mèr
Mèt in pé limon dan out vi
Ou préfèr sitris pou sitronad riskap ?
Avan sa fé lo tri dan out priorité, akoz i tris pa sanb la vi oté
Soman si la vi i anvway aou kou sitron, aranz ali an limonad
Sa minm lo réyonèzté, lo dernié goute sitron la kréativité
Si lo trè tar lo Nek plis iltra limanité.
Sat i rès kan tout la fin broyé,
Gras lélan lo kèr maron.
Dan out vi, razout in pé limon
Va arondi ton doulèr,
Pou pa gliss tro vitman an roulib dan la pant an dsandan
Tourn lantropi an sintropi
Pou ton lantropriz, vomié ti pé tro olèrk tro ti pé.
Pa bezwin rèv sintropé, promès sarda la fin gaté.
Labondans lo kèr, poèt briyan na lo kèr volkan, na lora larkansièl
Jeunesse effervescente
Santi, Shanti, tat, respiration i fékonn lo fanmté bondié, son shakti.
Sak ti pa ti pa va rivé.
Va riv in lèr sak ti réalité i rouv in brèche.
Dan la vi an montan, na lité pou la non dualité
Dan mitan lo tan, na rèv an titan, nout tout in sèl kor, linité
Lo sant linivèr lé la minm dan kré out kèr
Pa bezwin tortiy out kor piton an piton pou rouv in sor, lor lé touzour anndan, pa déor.
Santi, Shanti, tat, respir ton shakti an mouramour
Aprési sak ti mouvman la vi i kour dan lam la mèr
Yo ga ! Linité ! I and I. Rastaman ! Bondié Zanahary partou dan la natir !
Na Tir in taf sanb lèr bondié mon solèy dan la natir, pou mi révéy, pa bezwin plis pou ni ris
Sové tortiyé i koné koman aprésié. Son lam i liane an limièr lor dan son kor
In trans dan mon nwar d’revans : mélancolie somans pou lakordans mon paradi,
I armèt lankostik dan mon lespri
Unis pour le ver, la verve, le verbe, qui germe dans ma colonne d’air.
La minm mi ropran favèr.
Uni pou la tèr, mi rotrouv mon lardèr.
Lo kèr i gonf, mi préfèr pèrd in pé lèr pou pa rès grokèr.
Mi nouri pa lo vèr pou pik mon kèr
Bassin dlo mon lam lé doré, mon tèt lé piké
La minm mon lam son kozé saplé i dévèrs in pli an lor dan mon kor
Koko pilé, paswar pou kanal Bondié
Somin méridién lé rouvèr pou mi pas war ali son kaz
Mwin la tir bouson lilizion lo séparasion
Ravine lamour i débord boranbor dan mon kor
Kundalini i vé lévé, lès ali lévé
Bonb organik i vé splozé, lès ali splozé
Mes racines sont des armes d’élévation massive
Mon maloya, une arme de pulsation native
Lo 7ème lam la mèr, 7ème shakra pou mon rèv i aktiv
Ananda zis ddsi mon tèt, alor tan mié si lé piké !
Ker koigné, ker maron, résonnance cosmique.
Dan mon kadans saloupé, in larm sikré i lès sap lèr bondié dan kwin mon zié
Mi sap dan la brèche, mi respir son parantèz
Mon lespri i bèz la sians
Pwin persone i romark mon vativien dan mitan lo tan
Mi viv lantman mé mi rèv an gran
Déor la pwin gran sanzman
Mé anndan, bel koudvan
An atandan mi pran lélan dan mitan lo tan
Pou dans an diab dan tan siklone.
Pou sa minm mi déboulone zot lanfèr
Loraz maronaz i asezone mon paradi
Tout bon koté na son lanvèr
Tout mové koté na son mièl vèr
An atandan, nul besoin de raconter des salades pour les cabris
Akoz mouvman la vi i kour dan lam la mèr
Romont la sours aou, mouvman kont nasion i fé gonf lo bra forstan ramé
Kan ou va rodsann, ou sra plis armé.
Anmaré dan la maré sanb la sours ton paradi
L’investissement pou out bours va ran aou grozèf
Mé lo kèr i pèrd lèr, la tèt i pèrd lo nor
Lo kor lé asid, la mor i atann, lardèr i dsann an sann
Mouvman la vi i kour dan lam la mèr
Afèr kour pli vitman dan la kours ?
Romont an bisik ziska la sours
Sasèr i koné i fo pa déranz lo somèy lours
Va riv in révèy, lam la mèr va gob ton lam
In tan pou ri dan zintanpéri in pé kri
Akout ton lam, li fouèt, li tap, li kal, pou kass lo kui sanb bondié
Pou pik ton tèt, ke va ni an paswar pou lamrita bondié
Pa par azar lam kréol la may dan lam la mèr
Li lé né dan tanbour siklone
In fénésans o pwal pou pèrs lo vwal son bato fou
Pa bezwin kozman lo van Sarda pou avansé
Le vent se garrigarise de sa vanité ! Ga ri ga !
Soman kréol li koné mouvman la vi i kour dan lam la mèr
Tèl bèzman i pèt, li débaskil koté mèr
Si li andos son kolèr tèl i lèv, li romont an zanguiy dan la montay
Ala son mouvman la vi,
Dopi la mèr son momon, ansanb siklone son gran frèr
Li romont ziska la montay son dinité, protézé par lo volkan son papa
Li ardsann, li dans si limon, son pié lé lézé
In karma maron
Sa ankor in détay pou li ! Akoz li la finn égiz son dé ti bwa pou tay son rèv
Sat i kont astèr, pèrs lo vwal bato fou
Féklat in réyonèzté illimité
Va riv in lèr, bato fou sra persé partou
Lam kréol sra bersé an vol volé dan péyi larkansièl
Ti dousman, ti dousman, si santié i mont kaz bondié.
Dopi débi di kont, anfinnkont li koné zwé ti kaz sanb la vi, sa lé parké dan kré son kèr : son sant linivèr.
Pa bezwin tortiy ton kor plis ke sa.
Na kal lénerzi vital dan kolone vertebral
Kozman Amilkar kabral va redone atwé favèr, va romèt mièl ver dan lindependans
Aou i swazi lo kap vèr out réyonèzté ilimité
Vomié aou minm i rakont out zistwar
Akoz mouvman la vi i kour dan lam la mèr
